<title xml:lang="sa">Itihāsasamuccaya Charles LiUniversität Hamburg TST Project 2026 Internet Archive ark:/13960/s230b5zxtsk https://archive.org/details/DWVC_itihas-samuchchaya-of-vyasa-1916-lakshmi-venkateshvar-mudranalay-mumbai This copy of the Itihāsasamuccaya was digitized by eGangotri as part of the Mumukshu Bhawan Varanasi Collection and uploaded to the Internet Archive in 2022. This is the editio princeps, published in 1915/1916 (śaka 1838, saṃvat 1973), although an earlier Greek translation by Demetrios Galanos was published in 1851. Itihāsasamuccaya AuśīnaropākhyānaItihāsasamuccaya Mudgalopākhyāna 2 unnumbered, 1-151, 1 unnumbered Mumbai

IAST transliteration.

 tasmāt tvam api rājeṃdra dehi nyāyārjitaṃ dhanam || dānāj jñānaṃ ca tat prāpya jñānāt_ siddhiṃ ca yāsyasi || 60 || caturtho 'dhyāyaḥ 4 |

vaiśaṃpāyana uvāca ||

kathayaṃtaṃ hitārthānāṃ prabhāvānadbhutāṃs tathā || romaśaṃ dharmatatvajñaṃ paryyapṛcchad yudhiṣṭhiraḥ || 1 ||

yudhiṣṭhira uvāca ||

yo rakṣet prāṇinaṃ rājā bhayāttaṃ śaraṇāgatam || tasya puṇyaphalaṃ yat syāt tan me brūhi tapodhana || 2 ||

romaśa uvāca ||

ekataḥ kratavaḥ sarve samāptavaradakṣiṇāḥ || ekato bhayabhītasya prāṇinaḥ prāṇarakṣaṇam || 3 || etad eva purā devā tulayā samatolayan || prāṇarakṣaṇam eveha gauraveṇātiricyate || 4 || atraivodāharaṃtīmam itihāsaṃ purātanam || iṃdrasyāgneś ca saṃvādaṃ śiber auśīnarasya ca || 5 || varttamāne mahāyajñe jijñāsārthaṃ śibiṃ nṛpam || iṃdraḥ śyenaḥ kapoto 'gnir bhūtvā tatropajagmatuḥ || 6 || atha taṃ nṛpatiṃ prāpya kapotaḥ śyenato bhayāt || śaraṇārthī mahīpālaṃ nililye bhayavihvalaḥ || 7 || tataḥ śanair upāgamya śyenarūpī sureśvaraḥ || rājānaṃ sumahātmānaṃ provācedaṃ vacas tadā || 8 ||

śyena uvāca ||

dharmātmānaṃ bhuvi prāhur ekaṃ tvādyamahīkṣitam || tvaṃ vai śaraṇadānena rakṣa māṃ pīḍitaṃ kṣudhā || 9 || dharmabudhyā tvayā dharmaḥ kriyate sūkṣmabuddhinā || sa tvaṃ dharmaviśuddhena kathaṃ dharmaṃ cikīrṣasi || 10 || bhavān_ kṛtaghnaṃ dānena satyenānṛtavādinam || kṣamayā krūrakarmāṇam asādhuṃ sādhunā jayet || 11 || ko 'yaṃ dharmas tavedānīm ahaṃ vismayam īyivān || asādhuḥ pālyate rājan sādhur vai pālyate tvayā || 12 || nāpakārāpareṣv evam upakāraparo janaḥ || apakārapare 'pi tvam upakaraparo janaḥ || 13 || ahite hitabuddhis tvaṃ pāpeṣu tvam apāpakṛt || doṣānveṣaṇadakṣo 'pi guṇānveṣaṇatatparaḥ || 14 || tad eṣa vihito bhakṣaḥ pīḍyamānasya me kṣudhā || mā hiṃsīr lobhato dharmaṃ dharmam utsṛṣṭavānasi || 15 ||

rājovāca ||

saṃtrastarūpī trāṇārthī tvatto bhīto vihaṃgamaḥ || matsakāśam anuprāptaḥ pālyo 'gaghrugayaṃajānato 'pīndraṃ tadbhāraty evaṃ jagāda | khagaḥ || 16 || tad evam āgatasyāsya kapotasya mayārthinaḥ || katham asmadvidhaḥ kuryāt tyāgaṃ sadbhir vigarhitam || 17 || lobhād veṣād bhayād vāpi yastyajeccharaṇāgatam || brahmahatyāsamaṃ tasya pāpam āhur manīṣiṇaḥ || 18 || śāstreṣu niṣkṛtir dṛṣṭā mahāpātakinām api || śaraṇāgatahaṃtus tu na dṛṣṭā niṣkṛtiḥ kvacit || 19 || yathātmanaḥ priyāḥ prāṇāḥ sarveṣāṃ prāṇināṃ tathā || tasmān mṛtyubhayatrastās trātavyāḥ prāṇino budhaiḥ || 20 || janmamṛtyujarāduḥkhair nityaṃ saṃsārasāgare || jaṃtavaḥ parikliśyaṃte mṛtyos trasyaṃti te tathā || 21 || yannimittaṃ bhaved doṣas trāso vā krodha eva vā || āyāso vā yathā duṣṭam ekāṃtam api na tyajet || 22 || mariṣyāmīti yad duḥkhaṃ puruṣasyopajāyate || jñeyas tenānumānena paro 'pi parirakṣitum || 23 || yathā ca te jīvitam ātmanaḥ priyaṃ tathā pareṣām api jīvitaṃ priyam || saṃrakṣase jīvitam ātmano yathā tathā pareṣām api rakṣa jīvitam || 24 || tasmān nāham imaṃ dīnam arpayiṣye kapotakam || yad atra yuktam anyaṃ te vaktuṃ śyenāśu tad vada || 25 || prāyaśaḥ puruṣā loke sarvabhūtadayāparāḥ || gacchaṃti brahmasadanam iti prāhur manīṣiṇaḥ || 26 || mahatām api yajñānāṃ kālena kṣīyate phalam || bhītābhayapradānasya kalāṃ nārhati ṣoḍaśīm || 27 || catuḥsāgaraparyaṃtāṃ yo dadyāt pṛthivīm imām || abhayaṃ sarvabhūtebhyas tayor abhayado 'dhikaḥ || 28 || api tyaje rājyam idaṃ śarīraṃ ca sudustyajam || nāgataṃ bhayasaṃtrastaṃ tyakṣye dīnaṃ kapotakam || 29 || yan me syāt tu śubhaṃ kiṃcid arjitaṃ pūrvajanmani || tenādya vai bhayārttānām ārtināśāya dehinām || 30 || na hy ahaṃ kāmaye rājyaṃ na svargaṃ nāpunarbhavam || prāṇināṃ duḥkhataptānāṃ kāmaye duḥkhanāśanam || 31 || yathā ca nānṛtā vāṇī mayā vai samudāhṛtā || satyenānena bhagavān_ prasīdatu maheśvaraḥ || 32 || āhārārthaṃ samāraṃbhas tava cāyaṃ vihaṃgamaḥ || yo ya iṣṭas tavāhāro hy anyaṃ vada dadāmy aham || 33 ||

śyena uvāca ||

evaṃ hi vihito 'smākaṃ dhātrā bhakṣaṃ kapotakaḥ || tam evotsṛjya nāhāraiḥ kāryam anyair nareśvara || 34 || āhārāt sarvabhūtāni saṃbhavaṃti nareśvara || āhāreṇa vivardhaṃte tena jīvaṃti jaṃtavaḥ || 35 || śakyate duṣkare 'py arthe ciraṃ rātreṇa jīvitum || na tv āhāravihīnena śakyaṃ varttayituṃ cirāt || 36 || bhakṣyād vilopitasyādya mama prāṇā viśāṃpate || visṛjya kāyaṃ yāsyaṃti paṃthānam apunarbhavam || 37 || mṛte ca mayi sarvaṃ me putradāraṃ mariṣyati || rakṣaṇena kapotasya bahūn prāṇān na rakṣasi || 38 || yo dharmaṃ bādhate dharmo na sa dharmaḥ paraṃtapa || avirodhī tu yo dharmaḥ sa dharmaḥ sadbhir ucyate || 39 || tasmād virodhidharmasya viciṃtya gurulāghavam || yato bhūyāṃs tato rājan kuru dharmavinirṇayam || 40 ||

rājovāca ||

nāsti satyāt paro dharmaḥ kaścid anyo hi khecaraḥ || prāṇināṃ bhayabhītānām abhayaṃ yaḥ prayacchati || 41 || varam etasya satvasya pradattābhayadakṣiṇā || na ca vājisahasrasya gosahasram alaṃkṛtam || 42 || abhayaṃ sarvabhūtebhyo yo dadāti dayāparaḥ || tasya dehād vimuktasya kṣaya eva na vidyate || 43 || hemadhenudharādīnāṃ dātāraḥ sulabhā bhuvi || durllabhaḥ puruṣo loke sarvabhūtadayāparaḥ || 44 ||

śyena uvāca ||

śyenāḥ kapotān khādaṃti śrutir eṣā sanātanī || mā rājan_ sāram ajñātvā kadalīstaṃbham āruha || pīyūṣabuddhim āsthāya viṣam aśnāsi kevalam || 45 ||

rājovāca ||

nāhaṃ kuśāstramārgeṇa kvacid vartte vihaṃgama || śāstre caivopadiṣṭo 'yaṃ dharmaḥ satvadayāparaḥ || 46 || sarvasatveṣu yad dānam ekasatve ca yā dayā || sarvasatvapradānāt tu dayaikā ca viśiṣyate || 47 || sarve vedā na tat kuryuḥ sarve yajñāś ca khecara || sarvatīrthābhiṣeko yo yaḥ kuryān prāṇināṃ dayām || 48 || vāṅ_manaḥkarmabhir ye tu sarvabhūtahite ratāḥ || dayādamitapāpmāno brahmalokaṃ vrajaṃti te || 49 || gacchatas tiṣṭhato vāpi jāgrataḥ svapato 'pi vā || yan na bhūtahitārthāya tat paśor iva jīvitam || 50 || jaṃgamāni ca bhūtāni sthāvarāṇi ca ye narāḥ || ātmavat parirakṣaṃti te yāṃti paramāṃ gatim || 51 || prāṇanāṃ vadhyamānānāṃ yaḥ kaścit samupekṣate || sa yāti narakaṃ ghoram iti prāhur manīṣiṇaḥ || 52 || rājyaṃ hi sakalaṃ caitat prayacchāmi tava dvija || yadi kāmayase hy anyaṃ varjayitvā kapotakam || 53 ||

śyena uvāca ||

yadi rājan kapote te sudṛḍhā bhaktir īdṛśī || tattvaṃ kapotatulyāni svamāṃsāni prayaccha me || 54 ||

rājovāca ||

anugraham imaṃ manye yan māṃ iyenābhibhāṣase || etat te 'haṃ prayacchāmi svamāṃsaṃ yāvad icchasi || 55 || yad apriyaṃ tat svajanaḥ kaścid vadati vā na vā || mama tu priyam evaitat kasmād abhihitaṃ cirāt || 56 || adhruveṇa śarīreṇa pratikṣaṇavināśinā || dhruvaṃ yo nārjeyed dharmaṃ sa śocyo mūḍhacetanaḥ || 57 || yadi prāṇyupakārāya deho 'yaṃ nopayujyate || tataḥ kim upacārāḥ syuḥ pratyakṣaṃ kriyate tathā || 58 ||

śyena uvāca ||

nātiriktam ahaṃ yāce tava māṃsaṃ nareśvara || yenāsya rakṣaṇaṃ me syāt tadvidhatsva narottama || 59 ||

romaśa uvāca ||

evam uktaḥ svamāṃsāni tam utkṛtya ca pārthivaḥ || prahṛṣṭas tolayāmāsa kapotena saha prabhuḥ || 60 || tyaktvātmasukhabhogecchā sarvasattvasukhaiṣiṇaḥ || bhavaṃti paraduḥkheṣu sādhavo nityaduḥkhitāḥ || 61 || dhriyamāṇaṃ tu tulyā kapotena samaṃ sadā || utkṛtya palalaṃ tasmāt kapotas tv adhiko 'bhavat || tataḥ prakṣīṇamāṃso sāv āruroha tulāṃ svayam || 62 || paraduḥkhāturā nityaṃ sarvabhūtahite ratāḥ || nopekṣaṃte mahānmānaḥ svasukhāni mahāṃty api || 63 || atha tasmin samārūḍhe tulām auśīnare nṛpe || devaduṃdubhayo neduḥ puṣpavṛṣṭiḥ papāta ha || 64 || tatas tasya tadā matvā devarājo dhṛtiṃ parām || śākraḥ svaṃ rūpam āsthāya vākyam etad abhāṣata || 65 ||

indra uvāca ||

indro 'ham asmi bhadraṃ te kapoto havyavāhanaḥ || jijñāsamānau tvāṃ rājann imaṃ yajñam upāgatau || 66 || naitat pūrve nṛpāś cakrur na kariṣyaṃti cāpare || mahākāruṇikeneha yat kṛtaṃ duṣkṛtaṃ tvayā || 67 || parārthe tyajataḥ prāṇānyā prītir abhavat tava || prāṇasaṃśayalubdheṣu na sā prāyo 'sti dehiṣu || 68 || parārthaikāṃtakalyāṇī svāśrayātyaṃtaniṣṭhurā || tvayy eva kevalaṃ rājan karuṇā karuṇāyate || 69 || svakarmapāśaiḥ sudṛḍhair baddhaṃ kṛtsnam idaṃ jagat || tvaṃ jagadduḥkhamokṣārthaṃ baddhaḥ karuṇāyā nṛpa || 70 || yathā sarvātmanā vāpi duḥkheṣu prahitaṃ manaḥ || tathā caivātmasaṃkhyāne vāsanāpi na śoṣitā || 71 || prakṛterṣyāṃ viśuddheṣu na hīnānavamanya ca || agatvā sadṛśaiḥ sparddhāṃ tvaṃ lokottaratāṃ gataḥ || 72 || paropakārajanmāno vidhātrā vihitās trayaḥ || sajalā jaladās tvaṃ ca saphalāś ca mahādrumāḥ || 73 || ātmaprāṇaiḥ paraprāṇānyo naraḥ parirakṣati || saḥ yāti tatparaṃ sthānaṃ yato nāvartate punaḥ || 74 || prāṇair api tvayā rājan rakṣitaḥ kṛpaṇo janaḥ || svamāṃsāny api dattāni dravyeṣv anyeṣu kā kathā || 75 || paśavo 'pi hi jīvaṃti kevalātmodaraṃbharāḥ || sa punar jīvaṃti ślāghyo yaḥ parārthe hi jīvati || 76 || kim atra citraṃ yat saṃtaḥ parānugrahatatparāḥ || na hi svadehaśītāya jāyaṃte candanadrumāḥ || 77 || paropakāravyāpāraparo yaḥ puruṣaḥ sadā || sa padaṃ tad avāpnoti parād api hi yat param || 78 || paropakāraikadhiyaḥ svasukhāya gataspṛhāḥ || jagaddhitāya jāyaṃte sādhavas tv ādṛśā bhuvi || 79 || yat te māṃsāni gātrebhyaḥ samutkṛttāni pārthiva || eṣā te śāśvatī kīrtir lokān anugāmiṣyati || 80 || divyarūpadharaś caiva pālayitvā ca medinīm || sarvān_ lokān atikramya brahmalokaṃ gamiṣyasi || 81 ||

romaśa uvāca ||

evam uktvā tam iṃdrāgnī jagmatus tridaśālayam || rājāpi kratum iṣṭvā hi sumude devavac ciram || 82 || ya idaṃ śṛṇuyān nityaṃ śibeś caritam uttamam || sa vidhūyeha pāpāni prayāti tridivaṃ naraḥ || 83 || viciṃtya rājā svaśarīram adhruvaṃ yaśaś ca sarvasya janasya durlabham || śarīradānāt parirakṣaṇaṃ tathā vidhāya lokatrayabhūṣaṇaṃ yayau || 84 ||

iti śrīmaditihāsasamuccaye auśīnaropākhyānaṃ nāma caturtho 'dhyāyaḥ || 4 ||